የጉግል ጀሚናይ የተጠቃሚዎች ቁጥር 750 ሚሊዮን ደረሰ፡፡
· AI Investment
Google’s Gemini app surpasses 750 million monthly users, strengthening its position in the global AI race.
አማርኛ፣ ኦሮምኛ እና ትግርኛ ቋንቋዎችን ጨምሮ በዓለማቀፍ ደረጃ ከመቶ በላይ በሆኑ ቋንቋዎች ከተጠቃሚዎች ለሚቀርብለት ጥያቄ ምላሽ በመስጠት የሚታወቀው የጉግሉ ጀሚናይ የቻትቦት መተግበሪያ ወርሃዊ የተጠቃሚዎች ቁጥር 750 ሚሊዮን ማለፉ ተገለፀ፡፡ ይህ የተገለፀው ጉግል የ2025 ዓ.ም (እ.ኤ.አ) አራተኛ ሩብ ዓመት የገቢ መግለጫውን ይፋ ባደረገበት ወቅት ነው።
ይህ ካለፈው ሩብ ዓመት የ650 ሚሊዮን ተጠቃሚዎች ቁጥር ጋር ሲነፃፀር ከፍተኛ ዕድገት ያሳየ ነው ተብሏል፡፡ ይህም ጀሚናይን በሰው ሰራሽ አስተውሎት ቴክኖሎጂ ዘርፍ ግንባር ቀደም ተፎካካሪ አድርጎታል።
ምንም እንኳን ጀሚናይ በወር 500 ሚሊዮን ተጠቃሚዎች ካሉት ሜታ ኤ.አይ ቢበልጥም አሁንም 810 ሚሊዮን ተጠቃሚዎች ካለው ቻት ጂ.ፒ.ቲ እየተከተለ ይገኛል። ይህ ስኬት የተመዘገበው እጅግ ዘመናዊውና ጥልቅ ምላሾችን መስጠት የሚችለው ጀሚናይ 3 ሞዴል ይፋ መደረጉን ተከትሎ ነው።
የጉግል ኩባንያ ዋና ሥራ አስፈፃሚ ሰንዳር ፒቻይ የጀሚናይ ዕድገት የጉግል ዓመታዊ ገቢ ለመጀመሪያ ጊዜ 400 ቢሊዮን ዶላር እንዲያልፍ ትልቅ አስተዋጽኦ ማድረጉን ገልፀዋል፡፡ ኩባንያው ከኢንቪዲያ ጋር ለመወዳደር የሚያስችለውን አይረንዉድ የተሰኘ የራሱን ቺፕ ማዘጋጀቱም ዋና ሥራ አስፈጻሚው መጠቆማቸውን ቴክክረንች ዘግቧል።
Source: Ethiopian Artificial Intelligence Institute